صفحات: ۶۰۰ قیمت: ۱۰۰۰ روپے لفظ تحریک، بجائے خود اس امر کی علامت ہے کہ اگر کسی معاشرے میں فکری جمود پیدا ہو رہا ہو تو اسے توڑا جائے اور ذہنوں کو نئے زاویوں کی جانب مائل کیا جائے۔ عالمی سطح پر مذہب، سیاست ، علم و فن اور ادب کی دنیامیں ایسی تحریکیںرونما ہوتی رہی ہیں۔ اردو زبان و ادب بھی اس سے مستثنیٰ نہیں ہے۔ ملک کی کئی جامعات میں عالمی ادبی تحریکوں کے ساتھ ساتھ پاکستان میں اثرانداز ہونے والی تحریکوں کو بھی شامل نصاب کرلیاگیا ہے۔ ڈاکٹر انور سدید نے اس صورت حال کو محسوس کیا اور ان آوازوں کی طرف بھی متوجہ ہوئے جو وقفے وقفے سے بلند ہوتی رہیں کہ اردو ادب جمود کا شکار ہے۔ یہی ردعمل انھوں نے اپنے پی ایچ ڈی کے تحقیقی مقالے کے ذریعے اس طرح پیش کیا کہ تحریکوں کی اہمیت اجاگر ہوگئی۔ انھوں نے تحریکوں اور ان کے عوامل پر روشنی ڈالنے کے علاوہ ان تمام ادبی، عمرانی، مذہبی تحریکوں کا بھی مفصل تذکرہ کیا ہے جو عالمی سطح پر ظہور پذیر ہوئیں اور جن کا اردو ادب پر گہرا اثر مرتب ہوا۔